‘బాహుబలి2’ తరువాత తెలుగులో తమన్నా మరే ప్రాజెక్ట్‌ను అంగీకరించలేదు. ప్రస్తుతం తమిళంలో ఒకటి, అలానే హిందీలో మరో సినిమా చేస్తోంది ఈ మిల్క్ బ్యూటీ. అయితే తాజాగా తమన్నా ఓ తెలుగు సినిమాకు అంగీకరించినట్లు తెలుస్తోంది. నందమూరి కల్యాణ్ రామ్ హీరోగా నటించనున్న సినిమాలో తమన్నాను హీరోయిన్‌గా ఎంపిక చేసుకున్నారని సమాచారం. సిద్ధార్థ్‌తో ‘180’ అనే చిత్రాన్ని తెరకెక్కించిన జయేంద్ర దర్శకత్వంలో ఈస్ట్ కోస్ట్ ప్రొడక్షన్స్ సంస్థ ఓ సినిమాను నిర్మించబోతుంది. ఈ సినిమాలో కల్యాణ్ రామ్ హీరోగా నటించనున్నాడు.
కల్యాణ్ రామ్ సరసన నటించడానికి తమన్నా కూడా గ్రీన్ సిగ్నల్ ఇచ్చేసినట్లు ఫిల్మనగర్ వర్గాలు చెబుతున్నాయి. ప్రస్తుతం ‘ఎమ్మెల్యే’ సినిమాలో నటిస్తున్నాడు కల్యాణ్ రామ్. ఆ సినిమా అక్టోబర్ నాటికి పూర్తవుతుంది. అది పూర్తయిన వెంటనే జయేంద్ర దర్శకత్వంలో కొత్త సినిమా మొదలుకానుంది. ప్రస్తుతం తెలుగులో అవకాశాలు తగ్గిపోయిన తమన్నాకు ఇది మంచి ఛాన్స్ అనే చెప్పాలి. ఇకపై మిడ్ రేంజ్ హీరోలతో కలిసి అమ్మడు నటించే అవకాశాలు కూడా ఉన్నాయి. ప్రముఖ సినిమాటోగ్రాఫర్ పీసీ శ్రీరామ్ ఈ సినిమాకు పని చేయనున్నారు.
