సంచలన దర్శకుడు రామ్ గోపాల్ వర్మ తెరకెక్కిస్తున్న మరో వివాదాస్పద చిత్రం కమ్మ రాజ్యంలో కడప రెడ్లు ఇప్పటికే సినీ అభిమానుల చూపును తనవైపు తిప్పుకుంది. వర్మ ఏది చేసినా ఇలానే ఉంటుంది అనే మాటకు పూర్తి న్యాయం చేస్తూ ఈ సినిమాను తెరకెక్కించేస్తున్నాడు ఈ డైరెక్టర్. ఇక ప్రస్తుత ఆంధ్రప్రదేశ్ రాజకీయాలను టార్గె్ట్ చేస్తూ వర్మ ఈ సినిమాను తెరకెక్కిస్తున్నట్లు ఇప్పటికే చెప్పాడు. కాగా తాజాగా ఈ సినిమాకు సంబంధించిన తొలి టైటిల్ సాంగ్‌ను రిలీజ్ చేశాడు వర్మ.
కమ్మ రాజ్యంలో కడప రెడ్లు అంటూ సాగే ఈ పాటలో ఆంధ్రప్రదేశ్ అసెంబ్లీ సమావేశంలోని కొన్ని సీన్లను యాడ్ చేసాడు దర్శకుడు. ఏపీ సీఎం జగన్, ప్రతిపక్ష నేత చంద్రబాబుల మాటలతో పాటు వైకాపా నేత అనిల్ కుమార్ యాదవ్ తదితరుల స్పీచులను ఈ పాటలో పొందుపర్చాడు. మొత్తానికి వర్మ మరోసారి చంద్రబాబును టార్గెట్ చేసి ఈ సినిమాను తెరకెక్కిస్తున్నట్లు మనకు స్పష్టంగా తెలుస్తుంది. అయితే ఈసారి కేవలం చంద్రబాబునే కాకుండా ఆయనతో పాటు ఉన్న తెదేపా నాయకులందరినీ టార్గెట్ చేసి ఈ సినిమాను తెరకెక్కిస్తున్నాడు.
రాజకీయ నాయకులకు కునుకు లేకుండా చేస్తున్న వర్మ, కమ్మ రాజ్యంలో కడప రెడ్లు అనే సినిమాలో అసలు ఏం చెబుతాడా..? అనే ఆసక్తి అంతటా నెలకొంది. ఇక ఈ సినిమా తారాగణం గురించి త్వరలో తెలియజేస్తానంటున్నాడు వర్మ. మరి ఈ వివాద్సాపద చిత్ర టైటిల్ సాంగ్, ఇంకెన్ని వివాదాలను సృష్టిస్తుందో చూడాలి.
