Newsబోయింగ్ 777 లో.... మన తెలుగమ్మాయి.. తప్పక చదవాల్సిందే....

బోయింగ్ 777 లో…. మన తెలుగమ్మాయి.. తప్పక చదవాల్సిందే….

20623855_1646504738695015_992040595_n

పైలట్ కావాలని చాలా మందే కోరుకుంటారు. కానీ, ఆ కోరికను సాకారం చేసుకోవడం అంత తేలికేం కాదు.. దానికి చాలా ధైర్యం కావాలి. పైగా.. పురుషులకు మాత్రమే పరిమితమైందిగా భావించే ఈ వృత్తిలో మహిళలు రాణించాలంటే.. మరింత సాహసం చేయాల్సిందే. అందులోనూ.. ప్రపంచంలోనే అతిపెద్దవైన బోయింగ్-777 రకం విమానాలను ఆకాశ వీధుల్లో అత్యంత జాగ్రత్తగా తిప్పాలంటే.. ఇక ఎంత ఆత్మవిశ్వాసం ఉండాలో ఊహించుకోండి. అలాంటి బోయింగ్‌ విమానాలకు అతిపిన్న వయసు కెప్టెన్‌గా గుర్తింపు పొంది.. భారతదేశానికే గర్వకారణంగా నిలిచింది.. మన బెజవాడ అమ్మాయి ‘దివ్య’. ఈ ఘనత సాధించిన తొలి భారతీయ అమ్మాయి దివ్యే కావడం విశేషం. అకుంటిత దీక్ష, అంతులేని విశ్వాసంతో ఆమె ఆకాశం వైపు వేసిన అడుగులు.. చిన్ననాటి నుంచే గగన వీధుల్లో చక్కర్లు కొట్టాలని తపన పడిన దివ్యకు తన కోరికను సాకారం చేసుకోవడం అంత సులభమేమీ కాలేదు. ఆమెకు ఆ రంగంతో ఏమాత్రం పరిచయం లేదు. సరైన మార్గనిర్దేశం చేసేవాళ్లు కూడా లేరు. అయినా ఆమె.. పైలట్ కావాలనే కోరికను చంపుకోలేదు. దాని కోసం చాలా శ్రమించింది. దివ్య తండ్రి సైన్యంలో జవానుగా పనిచేసేవారు. ఆయన భార్యకు తొలి కాన్పులో ఓ పాప జన్మించింది. భార్య రెండోసారి గర్భం దాల్చినప్పుడు ఆయనకు పఠాన్‌కోట్‌ (పంజాబ్‌) సైనిక స్థావరానికి బదిలీ అయింది. దానికి దగ్గరే.. ఓ ఎయిర్‌ బేస్‌ ఉంది. గర్భిణిగా ఉన్న దివ్యా వాళ్లమ్మకు రోజూ అక్కడ చక్కర్లు కొట్టే యుద్ధ విమానాలను చూడటం అలవాటుగా మారింది.

అబ్బాయి పుడతాడని ఆశపడ్డ ఆమె.. పుట్టబోయే బిడ్డను పైలట్‌ చేయాలని గట్టిగా అనుకుంది. కానీ, మళ్లీ అమ్మాయే పుట్టింది. దివ్య పుట్టిన అనంతరం.. ఆమె తండ్రి తన సర్వీస్‌కు రాజీనామా ఇచ్చేసి, విజయవాడ వచ్చి స్థిరపడ్డారు. దివ్య తర్వాత ఆ దంపతులకు మరో అబ్బాయి పుట్టాడు. మాజీ సైనికాధికారి కావడం వల్ల పిల్లల చదువులకు ఇబ్బంది లేకున్నా.. కుటుంబానికి ఆర్థిక ఇబ్బందులు తప్పలేదు. ముగ్గురు పిల్లలతో బాధలు పడుతున్నా.. దివ్యా వాళ్లమ్మ పైలట్‌ కలని వదిలిపెట్టలేదు. అమ్మాయే అయినా సరే.. ఆ లక్ష్యాన్ని సాధించి తీరాల్సిందేనని దివ్యకు బాగా నూరి పోసింది. దీంతో దివ్యకు చిన్నతనం నుంచే పైలట్‌గా మారాలని బలంగా నాటుకుపోయింది. పదో తరగతి, ఇంటర్‌లో 90 శాతం మార్కులతో పాసైన దివ్యకు ఎంసెట్‌లోనూ మంచి ర్యాంక్ వచ్చింది. ఇంజినీరింగ్‌‌లో అడుగుపెట్టిన తొలినాళ్లలో.. ఆమె లక్ష్యం గురించి తెలుసుకున్న కొంత మంది మిత్రులు.. ఉత్తరప్రదేశ్‌లోని ఇందిరాగాంధీ రాష్ట్రీయ ఉడాన్‌ అకాడమీ గురించి చెప్పారు. అక్కడికెళ్లి చేరతానని కోరగా.. ఆర్థిక పరిస్థితి బాగా లేకపోవడంతో నాన్న ససేమిరా అన్నాడు. దివ్యకు.. వాళ్ల అమ్మా, అక్కా తోడుగా నిలవడంతో ఆయన దిగొచ్చారు.కాలేజీకెళ్లి కోర్సు ఫీజు వివరాలు కనుక్కుంటే.. రూ. 15 లక్షలు అవుతాయని తెలిసింది. తాహతుకు మించిన విషయం అని నాన్న మళ్లీ వెనక్కి తగ్గాడు. ‘అసలు ఈ కాలంలో ఎక్కడా కో-పైలట్‌ ఉద్యోగాలే లేవు. ఇంత పెట్టుబడి పెట్టడం అవసరమా!’ అంటూ చుట్టుపక్కలవాళ్లూ నిరుత్సాహపరిచారు.

దివ్యకు వాళ్లమ్మ అండగా నిలిచింది. ‘ముందు అమ్మాయిని ప్రవేశ పరీక్ష రాయనిద్దురూ.. ఎంపికైతే చూద్దాం!’ అంది. పరిమిత సీట్లే ఉండటంతో.. పోటీ తీవ్రంగానే ఉన్నా ప్రవేశ పరీక్షలో దివ్య అద్భుతంగా రాణించింది. ఆ తర్వాత ఆమె తండ్రి మారు మాట్లాడలేదు. 2006లో తన 17వ ఏట కాలేజీ క్యాంపస్‌లో అడుగుపెట్టిన దివ్యకు ఎన్నో అవమానాలు.. అక్కడ అందరూ డబ్బున్నవాళ్లే. పైగా దివ్యకు ఇంగ్లిష్ సరిగా రాదు. దీంతో తొలి రోజు నుంచే ఆమెకు వెక్కిరింతలు ఎదురయ్యాయి. ‘మొదటిసారి రైల్లో వచ్చా..’ అని ఆనందంగా చెబితే ‘కనీసం నీకు ఫ్లైట్‌ ఖర్చులు కూడా లేవా!’ అంటూ నవ్వారట. లక్ష్యం కోసం తపిస్తున్న దివ్య.. ఎన్ని అవమానాలనైనా భరించడానికి సిద్ధపడింది. దివ్య మినహా.. తన కోర్సుమేట్లలో చాలా మందికి ఆ రంగంతో అంతో ఇంతో అనుబంధం ఉంది. తమ తల్లిదండ్రులో.. బంధువులో.. ఎవరో ఒకరు ఆ రంగంలో ఉండటం వల్ల.. వాళ్ల నుంచి స్ఫూర్తి పొంది ఇటువైపు వచ్చినవారే అధికం. దీంతో బాగా కష్టపడితేగానీ.. ఫలితం దక్కదని అర్థం చేసుకొంది.

ఎంతో శ్రమపడి అనతికాలంలోనే ఆ రంగానికి చెందిన సాంకేతికత, నైపుణ్యాలను నేర్చుకుంది. ఆంగ్ల భాషపై కూడా పట్టు సాధించింది. కోర్సు చివరి ఏడాది నాటికి మొదటి ర్యాంకుతో సత్తా చాటింది. దీంతో స్కాలర్‌షిప్ కూడా వచ్చింది. విమానంలోకి తొలిసారిగా.. ఓ ప్రయాణికురాలిగా కాకుండా పైలట్‌గా సగర్వంగా అడుగుపెట్టింది. ఆ తర్వాత స్పెయిన్‌, లండన్‌లో బోయింగ్‌ విమానాల కెప్టెన్‌గా శిక్షణ తీసుకుంది. ప్రపంచంలోనే అతిపొడవైన బోయింగ్‌ 777 రకం విమానాలను నడపడం ప్రారంభించింది. ప్రత్యేకమైన రెండు ఇంజన్‌లు ఉంటే అతిపెద్ద విమానాలివి! అలాంటి విమానాలకు ప్రపంచంలోనే అతిపిన్న వయస్కురాలైన కెప్టెన్‌గా ఎంపికై.. ఔరా! అనిపిస్తోంది. కన్న కలను నెరవేర్చుకున్న దివ్య అమ్మానాన్నలకు విజయవాడలో మంచి ఇల్లు కట్టించింది. హైదరాబాద్‌లో తానూ ఓ ఇల్లు తీసుకుంది. అక్కను అమెరికాలో, తమ్ముణ్ని ఆస్ట్రేలియాలో చదివిస్తోంది. పైలట్‌ లక్ష్యం పూర్తయిందని ఊరుకోకుండా.. లా కూడా చదివింది. అన్నిరకాల నాట్యాలనూ అభ్యసించింది. సంస్కృత భాష నేర్చుకోవాలన్న ఒక్క కోరిక మిగిలిపోయింది. ప్రస్తుతం ఆ పనిలోనే ఉంది. ఉన్నతమైన లక్ష్యాలను సాకారం చేసుకోవాలనుకునే చాలా మంది యువతీయువకులకు దివ్య ఎంతో స్ఫూర్తిదాయకం కదూ!

20623855_1646504738695015_992040595_n

మ‌రిన్ని సినిమా వార్త‌ల కోసం ఈ లింక్ క్లిక్ చేయండి

Latest news